उदयनराजेंनी अमित ठाकरेंना केला परफ्यूम गिफ्ट

सातारा, २९ जानेवारी २०२३ : महाराष्ट्र नवनिर्माण सेनेच्या विद्यार्थी सेनेचे अध्यक्ष अमित ठाकरे हे सध्या पश्चिम महाराष्ट्र दौऱ्यावर आहेत. त्यांनी आज (रविवारी) खासदार उदयनराजे भोसले यांची त्यांच्या जलमंदिर पॅलेस निवासस्थानी भेट घेतली. यावेळी उदयनराजेंनी अमित ठाकरेंना बलगारी मॅन हा परफ्यूम भेट दिला. हा परफ्यूम भेट देण्यामागील कारणही उदयनराजे यांनी स्पष्ट केलं.

महाराष्ट्र नवनिर्माण सेनेचे अध्यक्ष राज ठाकरे यांचे चिरंजीव अमित ठाकरे यांचे काल (शनिवारी) रात्री उशिरा साताऱ्यात आगमन झाले. यावेळी शासकीय विश्रामगृहात त्यांचे मनसेचे सातारा शहराध्यक्ष राहुल पवार यांनी स्वागत केले. यावेळी मनसेच्या कार्यकर्त्यांनी जोरदार घोषणाबाजी व फटाक्याची आतषबाजी करत त्यांचे जल्लोषात स्वागत केले.

आज (रविवार) सकाळी अमित ठाकरे यांनी आपल्या पश्चिम महाराष्ट्र दौऱ्याची सुरुवात करण्यापूर्वी खासदार उदयनराजे भोसले यांची त्यांच्या जलमंदिर पॅलेस या निवासस्थानी भेट घेतली. यावेळी उदयनराजे भोसले यांनी त्यांचे पुष्पगुच्छ व सातारी कंदी पेढे देऊन स्वागत केले. अमित ठाकरे यांनीही उदयनराजे यांचा सत्कार केला.

आमचे त्यांच्याशी जुनं नातं

यावेळी अमित ठाकरे म्हणाले, “साताऱ्याला आलो आणि राजेंना भेटलो नाही असे होणार नाही, आमचे त्यांच्याशी जुनं नातं आहे. ही राजकीय भेट नाही. ते म्हणाले की मुलगा आल्यासारखे वाटले त्यामुळे खूप बरे वाटले,”

ते आता लहान मुलगा राहिले नाहीत..

“मी अमित ठाकरे यांना बलगारी मॅन हा परफ्यूम भेट दिला आहे. कारण ते आता लहान मुलगा राहिले नाहीत, ते आता मोठ्या माणसासारखे वागणार असून आपल्या सगळ्याची काळजी घेणार आहेत, असे उदयनराजे भोसले म्हणताच उपस्थितात हास्याचे फवारे उडाले.