स्थावर संपदा क्षेत्रातील एजंटसच्या सहाव्या परीक्षेचा निकाल जाहीर, 7624 पैकी 6755 उमेदवार यशस्वी

मुंबई, 27 जानेवारी 2025: स्थावर संपदा क्षेत्रातील एजंटसच्या नुकत्याच झालेल्या सहाव्या परीक्षेचा निकाल जाहीर झाला असून 7624 पैकी 6755 उमेदवार यशस्वी झालेले आहेत. या सहाव्या परीक्षेचा निकाल 89% लागला आहे. पहिल्या परीक्षेचा निकाल 96% आणि दुसर्‍या परीक्षेच्या निकाल 93% ,तिसऱ्या परीक्षेचा निकाल 89% आणि चौथ्या परीक्षेचा निकाल 86%, पाचव्या परीक्षेचा निकाल 87% लागला होता.

सहाव्या परीक्षेला 7624 उमेदवार बसले होते आणि 6755 यशस्वी झाले आहेत. यात 5637 पुरूष आणि 1118 महिलांचा समावेश आहे. यापैकी 264 उमेदवार ज्येष्ठ नागरिक असून यात 13 महिला आहेत.
या परीक्षेत पुण्याच्या श्री.प्रवीण कांबळे यांनी 98% गुण मिळवून गुणानुक्रमे पहिले स्थान मिळवले आहे. यात मुंबईतील 84 वर्षीय श्री. दौलतसिंह गढवी हेही यशस्वी झालेले आहेत.

आतापर्यंत झालेल्या सहाही परीक्षांमधून 20,125
उमेदवार एजंटससाठी पात्र ठरले आहेत. यात आताच्या परीक्षेत 6755,पहिल्या परीक्षेत 405 आणि दुसऱ्या परीक्षेत 2812 , तिसऱ्या परीक्षेत 4461 आणि चौथ्या परीक्षेत 1527, पाचव्या परीक्षेत 4165 असे एकूण 20,125 उमेदवार पात्र ठरले आहेत.

महारेराने 10 जानेवारी 2023 च्या आदेशान्वये एजंटसच्या नवीन नोंदणी आणि नूतनीकरणासाठी प्रशिक्षण घेऊन विहीत प्रमाणपत्र प्राप्त केलेले असणे बंधनकारक केलेले आहे.

स्थावर संपदा क्षेत्रातील ‘एजंट’ हा घर खरेदीदार आणि विकासक यांच्यातील अत्यंत महत्त्वाचा दुवा आहे . बहुतेकवेळा ग्राहक पहिल्यांदा एजंटसच्याच संपर्कात येतात. ग्राहकांना प्रकल्पाच्या अनुषंगाने प्राथमिक माहिती त्यांच्याकडूनच मिळते. एजंटसचे हे महत्त्व लक्षात घेऊन या क्षेत्रात कार्यरत सर्व एजंटसना रेरा कायद्यातील महत्वाच्या तरतुदी माहीत असायला हव्यात. त्यांच्याकडून ग्राहकाला आदर्श विक्री करार( Agreement for Sale), घर नोंदणी केल्यानंतर दिले जाणारे नोंदणी पत्र ( Allotment letter) चटई क्षेत्र, दोष दायित्व कालावधी अशासारख्या विनियामक तरतुदींची प्राथमिक माहिती देताना त्यात समानता, सातत्य आणि स्पष्टता
असायला हवी. या माहितीच्या आधारेच ग्राहक घरखरेदीचा निर्णय घेतात. म्हणून ग्राहकहित डोळ्यासमोर ठेवूनच महारेराने हे प्रशिक्षण आणि प्रमाणपत्र बंधनकारक केलेले आहे.