अजित पवारांना लांडग्याचं पिल्लू, तर सुळेंना लांडग्याची लेक टीका करणे गोपिचंद पडळकरांना भोवणार? वकिलांनी पाठवली नोटीस

पुणे, १२ ऑक्टोबर २०२३: गोपीचंद पडळकरांनी अजित पवारांचा उल्लेख ‘लबाड लांडग्याचं लबाड पिल्लू’ असा केला होता. या वक्तव्यामुळे पडळकरांच्या अडचणी वाढण्याची शक्यता आहे.

भारतीय जनता पार्टीचे आमदार गोपीचंद पडळकर यांनी काही दिवसांपूर्वी धनगर आरक्षणाच्या प्रश्नावरून उपमुख्यमंत्री अजित पवार व खासदार सुप्रिया सुळे यांच्यावर खोचक टीका केली होती. अजित पवार हे लबाड लांडग्याचं लबाड पिल्लू आहे. तर सुप्रिया सुळे लबाड लांडग्याची लेक आहे, अशा आशयाची टीका गोपीचंद पडळकरांनी केली होती. या टीकेनंतर भाजपाच्या वरिष्ठ नेत्यांनी गोपीचंद पडळकरांना समज दिल्याचं बोललं जात होतं. पण आता गोपीचंद पडळकरांना संबंधित वक्तव्य भोवण्याची शक्यता आहे.

बारामतीचे माहिती अधिकार कार्यकर्ते नितीन यादव यांनी वरिष्ठ वकील असीम सरोदे यांच्या माध्यमातून गोपीचंद पडळकर यांना नोटीस पाठवली आहे. गोपीचंद पडळकरांनी सात दिवसांच्या आत जाहीर माफी मागावी, अन्यथा पुढील कायदेशीर प्रक्रिया सुरू केली जाईल, असा इशारा नोटीसमधून देण्यात आला आहे. त्यामुळे गोपीचंद पडळकरांच्या अडचणी वाढण्याची शक्यता आहे.

संबंधित प्रकरणावर भाष्य करताना वकील असीम सरोदे म्हणाले, “गोपीचंद पडळकर यांनी काही दिवसांपूर्वी जाहीर विधान केलं की, अजित पवार हे लांडग्याचं पिल्लू आहे आणि सुप्रिया सुळेही लांडग्याचं पिल्लू आहे. पण दुसऱ्याची अब्रू नुकसान करणं, अत्यंत चुकीचं आहेय. त्यामुळे बारामतीचे माहिती अधिकार कार्यकर्ते नितीन यादव यांच्यातर्फे गोपीचंद पडळकर यांना नोटीस पाठवली आहे. त्यांनी जाहीर माफी मागावी असं नोटीसमध्ये सांगण्यात आलं आहे. पडळकरांनी सात दिवसात माफी मागितली नाही किंवा नोटीसला उत्तर दिलं नाही, तर पुढील कायदेशीर प्रक्रिया केली जाईल.”

गोपीचंद पडळकर नेमकं काय म्हणाले होते?
धनगर आरक्षणाच्या प्रश्नावर गोपीचंद पडळकर म्हणाले, “धनगर समाजाबद्दल अजित पवार यांची भावना स्वच्छ नाही. म्हणून अजित पवार यांना पत्र देण्याची गरज नाही. अजित पवार लबाड लांडग्याचं लबाड पिल्लू आहेत. अजित पवारांना आम्ही मानत नाही आणि कधी पत्रही दिलं नाही. पुढेही देण्याची आवश्यकता वाटत नाही. त्यामुळे ज्यांच्याकडून आम्हाला न्याय मिळू शकतो, अशा मुख्यमंत्री आणि उपमुख्यमंत्री फडणवीस यांना पत्र दिलं आहे.”

“मराठा, धनगर, लिंगायत आणि मुस्लीम समाजाची भाजपाने फसवणूक केली आहे,” असं वक्तव्य खासदार सुप्रिया सुळे यांनी केलं होतं. यावरही पडळकरांनी टीकास्र सोडलं आहे. “ही लबाड लांडग्याची लेक बोलत आहे. धनगर समाजाने तुमच्या पालख्या वागवल्या. लोकांच्या चपला फाटल्या, तरी तुमच्या वडिलांनी, भावाने, पुतण्याने किंवा तुम्ही धनगर समाजाकडं पाहिलं नाही. त्यामुळे धनगर समाजाबद्दल जास्त पुळका आणण्याची गरज नाही. आमचे लोक हुशार झाले आहेत,” असंही पडळकर म्हणाले होते.