देवेंद्र फडणवीस यांना पुण्याचा खासदार करा: अखिल भारतीय ब्राह्मण महासंघ

पुणे, १९ आॅगस्ट २०२२: लोकसभा निवडणुकीसाठी अजून दोन वर्ष शिल्लक असताना आत्तापासूनच पुण्याचा पुढचा खासदार कोण अशी चर्चा रंगू लागलेली आहे. त्यातच आता अखिल भारतीय ब्राह्मण महासंघाने देवेंद्र फडणवीस यांना पुण्यातून उमेदवारी द्या आणि खासदार करा अशी मागणी भाजपचे राष्ट्रीय अध्यक्ष जे पी नड्डा यांच्याकडे पत्राद्वारे केली आहे. त्यामुळे या निमित्ताने नागपूरचे फडणवीस पुणेकर होणार का अशी चर्चा रंगली आहे.

प्रत्येक वेळी अखिल भारतीय महासंघ पुण्यात भाजपच्या मागे ठामपणे उभा आहे, त्यामुळे २०२४ ला देखील देवेंद्र फडणवीस यांना निवडून आणण्यासाठी आम्ही प्रयत्न करू.

“तुम्ही फडणवीस यांची जी निवड केली आहे ती अतिशय सार्थ असून दिल्लीतलं राजकारणाची फडणीस यांची सुरुवात पुण्यातून हवी” अशी इच्छा देखील महासंघाने पत्रातून व्यक्त केली आहे.

राज्यामध्ये एकनाथ शिंदे यांचे सरकार आल्यानंतर पुण्याचे पालकमंत्री म्हणून देवेंद्र फडणवीस यांचे नाव चर्चेत आहे. फडणवीस पालकमंत्री झाल्यास जिल्ह्यातील अनेक प्रश्न मार्गी लागतील त्यामुळे हे जिल्ह्याच्या हिताचे असल्याचे बोलले जात आहे. मात्र अद्याप पालकमंत्री कोण हे निश्चित झालेले नाही. असे असतानाच आता पुण्याच्या खासदार म्हणून फडणवीस यांना उमेदवारी दिली जावी असे पत्र ब्राह्मण महासंघाने दिल्याने फडणवीस यांच्या नावाची जोरदार चर्चा सुरू आहे. यावर भाजपचे नेते काय निर्णय घेतात याकडे लक्ष लागलेले आहे.