“मी बाळासाहेबांचा वैचारिक वारसदार” राज ठाकरे
मुंबई, २३ जानेवारी २०२३ :लहानपणापासून मी विविध अंग बाळासाहेबांमध्ये पाहत आलो. वारसा हा वास्तूचा नसतो तर विचारांचा असतो. माझ्याकडे काही आलं असेल तर तो विचारांचा वारसा आला आहे आणि तो मी जपला आहे. संस्कार कुणी करत नसतो, संस्कार समोरच्या व्यक्तीच्या कृतीतून वेचायचे असतात.” अशा शब्दात मनसेचे अध्यक्ष राज ठाकरे यांनी भावना व्यक्त केली.
बाळासाहेब ठाकरे यांच्या ९७ जयंतीनिमित्त विधान भवनातील मध्यवर्ती सभागृहात स्व. बाळासाहेब ठाकरे यांच्या तैलचित्राचे अनावरण आज करण्यात आले. यावेळी मनसे पक्षप्रमुख राज ठाकरे यांनी आपल्या खुमासदार शैलीत भाषण करत बाळासाहेबांच्या आठवणी सांगितल्या. बाळासाहेबांच्या नावाच्या अगोदर जवळपास तीन ते सव्वातीन वर्षांनंतर हिंदूहृदयसम्राट हे नाव लागत आहे, त्याबद्दल विधानसभा अध्यक्ष राहुल नार्वेकर यांचे राज ठाकरे यांनी अभिनंदन व्यक्त केले. तसेच मी बाळासाहेबांचा वैचारीक वारसदार असल्याचे सांगत राज ठाकरे यांनी आपल्या भाषणात जबरदस्त टोलेबाजी केली.
या लोकार्पण सोहळ्याला उपस्थित असलेले अनेकजण आणि उपस्थित नसलेले अनेकजण… यांना उद्देशून राज ठाकरे म्हणाले, “ज्या व्यक्तीमुळे ही विधानभवनाची इमारत तुम्हाला बघायला मिळाली त्या स्व. बाळासाहेब ठाकरेंचे तैलचित्र या इमारतीमध्ये लागत आहे, त्याबद्दल अभिमान वाटतो. शेकड्याने लोक विधानभवनात आली, मा. बाळासाहेबांनी त्यांना इथे पाठवले. त्यामुळे विधानसभा अध्यक्ष राहुल नार्वेकर यांना विनंती आहे की, त्यांनी विधानसभा आणि विधानपरिषदेतही बाळासाहेबांचे तैलचित्र लावावे. म्हणजे आपण कुणामुळे विधान भवनात आलो, हे त्यांना कळेल.”
“बाळासाहेबांबद्दल बोलायचे झाल्यास तर माझा कडेवरचा सहवास आहे, बोट धरून चालण्याचा सहवास आहे. व्यंगचित्राचा सहवास आहे. कुठून सुरुवात करु? असा प्रश्न पडतो. मी शिशू वर्गात असताना बाळासाहेब स्वतः गाडी चालवत मला घ्यायला यायचे. लहानपणापासून मी विविध अंग बाळासाहेबांमध्ये पाहत आलो. वारसा हा वास्तूचा नसतो तर विचारांचा असतो. माझ्याकडे काही आलं असेल तर तो विचारांचा वारसा आला आहे आणि तो मी जपला आहे. संस्कार कुणी करत नसतो, संस्कार समोरच्या व्यक्तीच्या कृतीतून वेचायचे असतात.”, अशा आठवणी राज ठाकरे यांनी यावेळी सांगितल्या.
एकनाथ शिंदे मुख्यमंत्रीपदी विराजमान होताच त्यांनी विधान भवनात बाळासाहेबांचे तैलचित्र लावण्याचा संकल्प सोडला. त्यानुसार विधिमंडळाच्या पावसाळी अधिवेशनात शिंदे आणि उपमुख्यमंत्री देवेंद्र फडणवीस यांनी बाळासाहेब ठाकरेंचे तैलचित्र विधान भवनात बसवण्याबाबत अध्यक्ष राहुल नार्वेकर यांच्याकडे मागणी केली होती. विधानसभा अध्यक्ष राहुल नार्वेकर यांनी विधिमंडळाच्या नागपूरमधील हिवाळी अधिवेशनात तैलचित्र लावण्याचे जाहीर केले. त्यानुसार २३ जानेवारी रोजी स्व. बाळासाहेब ठाकरे यांच्या ९७ व्या जयंतीचे औचित्य साधून हा कार्यक्रम आयोजित केला गेला.
