ताटं, कपबश्यांनंकर सभागृहात फळं स्वच्छ केली जातात शौचालयाच्या दारात

नागपूर, २३ डिसेंबर २०२२ : नागपूर हिवाळी अधिवेशनात आलेल्या आमदारांची व त्यांच्या कार्यकर्त्यांची राहण्याची व्यवस्था असलेल्या आमदार निवासात ताटं आणि कपबशा शौचालयात धुण्याचा प्रकार परवा उजेडात आला होता, त्यानंतर काल राष्ट्रवादी कॉँग्रेसचे आमदार अमोल मिटकरी यांनी तो मुद्दा सभागृहात उपस्थित केला होता.

कालच्या प्रकरणावरून तरी खानपानाच्या व्यवस्थेच्या बाबतीत काळजी घेतली जाईल, अशी अपेक्षा होती. पण आज सकाळी विधान भवन इमारत परिसरात असलेल्या शीतल ज्यूस सेंटरचे कर्मचारी शौचालयाच्या प्रवेशद्वारासमोरच संत्र्याची साल काढताना, इतर फळे धुताना आणि कापताना आढळले. त्यामुळे अधिवेशनात सहभागी झालेल्या हजारो लोकांच्या आरोग्याचा प्रश्न पुन्हा एकदा ऐरणीवर आला आहे.

विधान परिषद इमारतीच्या अगदी समोर असलेल्या ज्या शीतल ज्यूस सेंटरमध्ये हा प्रकार उघडकीस आला, त्या ज्यूस सेंटरमधून मंत्री, आमदार, सर्व अधिकारी यांना ज्यूस दिला जातो आणि येथे कामासाठी आलेले हजारो लोक ज्यूस पितात. विदर्भाच्या बाहेरून आलेले लोक तर हमखास संत्र्याच्या ज्यूसचा आस्वाद येथे घेतात. पण आज हा प्रकार उघडकीस आल्यानंतर गेले चार दिवस येथे ज्यांनी ज्यूस पिला, त्यांना उलटी होणेच, तेवढे बाकी राहिले होते.

म्हणे जागाच नाही..

शीतल ज्यूस सेंटरचे कर्मचारी शौचालयाच्या बाहेर संत्र्याची सालं आणि फळे धुताना आणि कापताना आढळल्यानंतर त्यांना विचारणा केली. तेव्हा येथे जागाच नसल्यामुळे शौचालयाच्या बाहेर लागुनच असलेल्या जागेत हे काम करावे लागते, असे उत्तर कर्मचाऱ्यांनी दिले. अर्थातच हे उत्तर पचनी पडण्यासारखे नाही.

सभागृहात गाजणार मुद्दा?

शौचालयात ताटं आणि कपबशा धुतल्याचा मुद्दा काल आमदार अमोल मिटकरी यांनी उपस्थित केला होता. त्यानंतर उपमुख्यमंत्री देवेंद्र फडणवीस यांनी संबंधित दोषींवर तत्काळ आणि कठोर कारवाई करण्याच्या सूचना दिल्या. आज शीतल ज्यूस सेंटरचा मुद्दादेखील सभागृहात तापण्याची शक्यता आहे. कारण हा कुण्या एका-दोघांचा नाही, तर हज्जारो लोकांच्या आरोग्याचा प्रश्न आहे. त्यामुळे प्रशासनाने एक विशेष पथक तयार करून या गोष्टींवर लक्ष ठेवण्याची गरज आहे