भाजपचा उद्धव ठाकरेंवर हल्लाबोल – ‘आम्ही काय केले हे तुम्हाला सांगायला आमचे काका की मामा’

मुंबई, ७ ऑगस्ट २०२३: माजी मुख्यमंत्री उद्धव ठाकरे यांनी रविवारी केलेल्या भाषणात उपमुख्यमंत्री देवेंद्र फडणवीस यांच्यावर टीका केली. त्यांचा उल्लेख मस्टर मंत्री असा केला होता. यानंतर आता भाजपाचे नेते आशिष शेलार यांनी मुंबईसाठी आम्ही काय केलं तुम्ही कोण? आमचे मामा की काका? असा प्रश्न विचारत आशिष शेलार यांनी उद्धव ठाकरेंवर जोरदार टीका केली आहे.

अफजलखान, औरंगजेब याच्या उचक्या ज्यांना रोज लागतात त्यांना आजच्या भाषणात इंग्रजांची उचकी लागली होती! म्हणे इंग्रजांनी मुंबईचा विकास केला, भाजपाने मुंबईसाठी काय केले? आज मैत्री दिन आहे, मग हेच जरा तुमचे जीवश्चकंठश्च असलेल्या काँग्रेसला विचाराना…त्यांनी साठ वर्षात काय केले? तुम्ही मुंबईवर 25 वर्षे राज्य केलेत तुम्ही काय केलेत ते सांगा?आम्ही काय करतोय आणि केले हे मुंबईकरांना माहिती आहे…त्यांना सगळा हिशेब देऊच! तुम्हाला सांगायला तुम्ही आमचे कोण? मामा की काका? तुमचा कारभार रोज उघडा पडतोय तो आधी झाका अशी टीका शेलार यांनी केली.

शेलार यांनी ही टीका केली आहे तर भाजपाचे प्रदेशाध्यक्ष चंद्रशेखर बावनकुळे यांनीही जोरदार प्रत्युत्तर दिलं आहे. फडणवीस हे मस्टर मंत्री नाहीत, ते मास्टर आहेत. त्यांच्याच मास्टर स्ट्रोकमुळे तुम्हाला घरी बसावं लागलं, असा हल्लाच चंद्रशेखर बावनकुळे यांनी चढवला आहे. चंद्रशेखर बावनकुळे यांनी ट्विट करून उद्धव ठाकरे यांच्या टीकेचा समाचार घेतला आहे.

तुम्ही बाळासाहेबांची शिवसेना काँग्रेसच्या दावणीला बांधून ठेवली होती. जी प्रामाणिक शिवसैनिकानं मुक्त केली आणि बाळासाहेबांचा भगवा झेंडा पुन्हा अभिमानाने महाराष्ट्रावर फडकला. पंतप्रधान नरेंद्र मोदी यांच्यावर टीका करण्याची तुमची लायकी नाही हे अनेकदा तुम्हीच सिद्ध केले आहे. देवेंद्रजी मस्टर मंत्री नाही तर मास्टर आहेत. त्यांच्या मास्टरस्ट्रोकमुळेच तुम्हाला घरी बसावं लागलं असा टोला बावनकुळेंनी म्हटलं आहे.

विश्वासहार्य राजकीय बातम्यांसाठी ज्वाईन करा “सरकार खबर” ग्रुप