“आमदार फुटण्याचे कळले होते” – अजित पवार यांचा गौप्यस्फोट

पुणे, ४ फेब्रुवारी २०२३: ‘आमदार फुटणार दोन ते तीन वेळा
कानावर आल्यानंतर उद्धव ठाकरे यांना सांगितले होते. शरद पवार, जयंत पाटील यांनीही ही माहिती त्यांना दिली होती. मात्र, आपले सहकारी इतकी टोकाची भूमिका घेतील, असे
त्यांना वाटले नव्हते,’ अशी माहिती विधानसभेचे विरोधी पक्षनेते अजित पवार यांनी दिली आहे.

पुण्यात एका कार्यक्रमानंतर पवार यांनी माध्यमांशी संवाद साधला. ठाकरे सरकारमधील शिवसेनेचे मंत्री, आमदार हे फुटणार असल्याचे वृत्त दोन ते तीन वेळा कानावर आले होते.
त्यानंतर ही माहिती उद्धव ठाकरे यांना देण्यात आली. ही माहिती तत्कालीन गृहमंत्री दिलीप वळसे पाटील, जयंत
पाटील तसेच शरद पवार यांनाही मिळाली होती. त्यांनीही ठाकरे यांना सांगितले होते. ठाकरे यांनी त्यांच्या
सहकाऱ्यांशी चर्चाही केली होती. तरीही आमदार फुटले, असे पवार म्हणाले.
सत्यजितने काँग्रेसबरोबर राहावे ‘नाशिक पदवीधर मतदारसंघातून विधान परिषदेवर निवडून आलेल्या सत्यजित तांबे काँग्रेसच्या विचारधारेशी निगडित आहेत. ते निवडणूक लढत होते, तेव्हा चेंडू काँग्रेसच्या कोर्टात
होता. आता ते निवडून आल्याने चेंडू त्यांच्या कोर्टात आहे. त्यांनी कोणत्या पक्षाबरोबर जावे, हा त्यांचा
प्रश्न आहे. मात्र, ते आताच निवडून आले आहेत, त्यांना चांगले राजकीय भवितव्य असून बरीच वर्षे राज्यात
कामही करायचे आहे. त्यांचे घराणे काँग्रेसच्या विचारधारेशी निगडीत आहे. त्यामुळे त्यांनी मनाला जादा लावून घेऊ नये आणि त्यांनी काँग्रेसबरोबर जावे, असा त्यांना माझा सल्ला आहे. या निवडणुकीत त्यांना मिळालेली मते पाहता महाविकास आघाडीतील इतरांनीही त्यांना मदत केलेली दिसते, असेही पवार म्हणाले.

‘वंचित’सोबत जाण्यास तयार…, पण ?
वंचित बहुजन विकास आघाडीस महाविकास आघाडीमध्ये घ्यावे, याबाबत पूर्वीही आमच्यात चर्चा झाली होती. मात्र, त्यांना महाविकास आघाडीत घ्यायचे असेल, तर त्यांनीही सकारात्मक भूमिका घेतली पाहिजे. त्यांच्या वरिष्ठांनी
आमच्या वरिष्ठांबद्दल वेगळी वक्तव्ये न करता चांगले बोलले पाहिजे. फारतर चार भिंतींच्या आत बोलले पाहिजे,’ अशी सूचना पवार यांनी केली आहे.

विश्वासहार्य राजकीय बातम्यांसाठी ज्वाईन करा “सरकार खबर” ग्रुप