ग्राहकहितासह स्थावर संपदा क्षेत्राची विश्वासार्हता वाढविण्यासाठी बांधकामांची सुनिश्चित कार्यपद्धती आणि मानके स्वंयंविनियामक संस्थाच्या मदतीने ठरविण्यावर महारेराचा भर

मुंबई, दिनांक 13 ऑक्टोबर : कायद्याने दोष दायित्व कालावधीमुळे घरबांधणीत राहिलेल्या त्रुटी दुरूस्त करण्याची सोय असल्याने ग्राहकहित जपल्या जात असले तरी , मुळात अशी वेळच येऊ देणे योग्य नाही. त्यासाठी आधीच बांधकामांबाबत प्रमाणित कार्यपद्धती ठरवून, मानकेही ठरवावी. जेणेकरून उत्तम गुणवत्तेचं काम होऊन ग्राहकही समाधानी राहतील . यासाठी महारेराने पुढाकार घेतला असून स्थावर संपदा क्षेत्रातील गुणवत्ता आश्वासन अहवालाचा आराखडा ( Framework for Quality Assurance Reporting) विकसित करण्यासाठी सर्व विकासकांचे प्रतिनिधित्व करणाऱ्या स्वंयंविनियामक संस्थांना पत्र लिहून त्यांच्या सूचना मागविल्या आहेत. अतिरिक्त खर्च करून दोष दूर करत बसण्यापेक्षा अशा तक्रारी मुळातच उदभवू नये यासाठी आधीच बांधकाम पातळीवर काय करता येईल ? कशी काळजी घेता येईल ? त्यासाठी सुनिश्चित कार्यपद्धती कशी ठरवायची ? त्यात कुठल्या कुठल्या बाबींचा समावेश ठेवायचा ? त्यासाठीचे मापदंडही कसे ठरवायचे ? याबद्दल महारेराकडे 31 ऑक्टोबर पर्यंत सूचना पाठवण्याची विनंती केलेली आहे .त्यांनी या सूचना [email protected] या ईमेलवर पाठवायच्या आहेत.

या सूचना आल्यानंतर महारेरा त्यावर आधारित एक सल्लामसलत पेपर (Cosultation Paper ) तयार करून तो सर्वांच्या सूचनांसाठी जाहीर करेल आणि त्याबाबतची पुढील कारवाई करेल.

यात विकासकांनी दर 6 महिन्याला प्रकल्पाच्या बांधकामात कुठल्या दर्जाचे साहित्य वापरले (यात सिमेंट, स्टील, रेती अशा सर्व बांधकाम सामग्रीचा समावेश अपेक्षित) , एकूण काम कशा पध्दतीने होते. यातील कुशल कामगारांची भूमिका काय या बाबी संकेतस्थळावर टाकाव्यात. ज्यामुळे ग्राहकांना गुंतवणूकीचा निर्णय घ्यायला चांगली अभ्यासपूर्ण माहिती उपलब्ध होईल.

कारण कुठल्याही गृहनिर्माण प्रकल्पाची गुणवत्ता ही अनेक घटकांवर अवलंबून असते. यात वापरले जाणारे साहित्य, काम करणाऱ्या कामगारांची कुशलता, एकूण बांधकामाच्या काळात विविध पातळ्यांवर पार पाडल्या जाणाऱ्या प्रक्रिया आणि त्यावर असणारे सुक्ष्म पर्यवेक्षण या घटकांचा विशेषत्वाने समावेश असतो . हे घटक परस्पर पूरक असून बांधकाम सामग्री चांगली परंतु वापरणारे योग्य नसणे किंवा कामगार कुशल आहे परंतु सामग्रीचा दर्जा योग्य नाही . शिवाय ज्यांनी या प्रकल्पाच्या एकूण कामा दरम्यान केल्या जाणाऱ्या विविध प्रक्रियांवर सजग राहून लक्ष दिले नसेल तर ? योग्य प्रकारे पर्यवेक्षण केले नसेल तर ? अशा अनेक बाबी प्रकल्पाची गुणवत्ता ठरवत असतात. याबाबत काही सुनिश्चित कार्यपद्धती ठरवून आपल्याला या क्षेत्रात गुणवत्तेचा आग्रह धरून, या क्षेत्राची विश्वासार्हता वाढवायची आहे. त्यासाठीच महारेराने हा प्रस्ताव तयार केला आहे . हा प्रस्ताव प्रभावीपणे राबविण्याचा महारेराचा निर्धार आहे.

स्थावर संपदा अधिनियमातील कलम 14 (3) नुसार प्रकल्पाच्या संरचनेतील कारागिरीतील दोष किंवा खरेदी करारात मान्य केलेल्या कुठल्याही बाबीतील त्रुटी हस्तांतरणानंतर 5 वर्षांसाठी कुठल्याही अतिरिक्त आकाराशिवाय 30 दिवसांत पूर्ण करण्याचे बंधन दोष दायित्व कालावधीनुसार विकासकावर असते. याची गरजच राहू नये ,यासाठी महारेराने हा प्रस्ताव आणलेला आहे.

“बहुतेक जण आयुष्यभराची कमाई घरखरेदीत गुंतवतात. घर ताब्यात आल्यानंतर दोष दायित्व कालावधीनुसार 5 वर्षापर्यंत विनाखर्च या तक्रारी सोडविण्याची जबाबदारी विकासकाची असते . तरीही अशावेळी घर ताब्यात आल्यानंतर अडचणींना सामोरे जायला लागू नये, यासाठी महारेराने गुणवत्तापूर्ण बांधकामांचा आग्रह धरायचे ठरविले आहे. म्हणून बांधकामांच्या वेळीच पाळायची सुनिश्चित कार्यपद्धती आणि मानके ठरविण्यात येत आहेत. यातून ग्राहकहित आणखी सुरक्षित व्हायला फार मोठी मदत तर होणार आहेच, शिवाय स्थावर संपदा क्षेत्राची विश्वासार्हता वाढायलाही मदत होणार आहे.” – अजोय मेहता, अध्यक्ष, महारेरा