प्रकाश आंबेडकरांच्या त्या कृतीवर उत्तर देण्याऐवजी आदित्य ठाकरेंनी काढली पळवाट
मुंबई, १८ जून २०२३: वंचित बहुजन आघाडीचे प्रमुख प्रकाश आंबेडकर यांनी औरंगजेबाच्या कबरीवर जाऊन फुलं वाहिल्याने राजकीय वाद निर्माण झाला आहे. त्यावरून वंचित सोबत युती करणाऱ्या शिवसेनेच्या ठाकरे गटाची गोची स्पष्ट झाले आहे. ठाकरे गटाचे नेते आदित्य ठाकरे यांना त्याबाबत प्रश्न विचारले असता मला याची माहिती नाही आत्ताच तुमच्याकडून माहिती मिळाली असे उत्तर देत शोधली आहे.
प्रकाश आंबेडकर यांनी औरंगजेबाच्या कबरीवर जाऊन फुलं वाहिल्याने पुन्हा एकदा हा वाद उकरून काढला आहे. एम आय एम चे खासदार इम्तियाज जलील यांनी प्रकाश आंबेडकर यांच्या या कृतीचे समर्थन करत स्वागत केले आहे तर वंचित आणि शिवसेनेच्या युतीवरून भाजपाने थेट उद्धव ठाकरेंवर हल्ला चढवला. तसेच प्रकाश आंबेडकरांच्या या कृतीवर ठाकरे गटाची भूमिका काय असा सवाल भाजपाने उद्धव ठाकरेंना केला. या सर्व वादाच्या पार्श्वभूमीवर आदित्य ठाकरेंना याबाबत विचारणा करण्यात आली. त्यानंतर त्यांनी प्रतिक्रिया दिली.
प्रकाश आंबेडकरांच्या औरंगजेब कबरीला भेट देऊन फुलं वाहण्याच्या कृतीविषयी विचारलं असता आदित्य ठाकरे म्हणाले, “मला आत्ताच माध्यमांकडून ही माहिती कळते आहे. मला त्याची माहिती घेऊ द्या आणि मग मी त्यावर बोलेन.”
शिंदे गटाने वर्धापन दिन साजरा करण्यापेक्षा ‘जागतिक गद्दार दिन’ साजरा करावा, असा खोचक सल्ला यावेळी आदित्य ठाकरे यांनी दिला. शिंदे गटाच्या गद्दारीची नोंद जगातील ३३ देशांनी घेतली आहे. त्यामुळे त्यांनी ‘जागतिक गद्दार दिन’ साजरा करून, त्यांनी किती निर्लज्जपणे गद्दारी केली होती, हे लोकांना दाखवून द्यावं, अशा शब्दांत आदित्य ठाकरेंनी टीकास्र सोडलं.
“जगातील ३३ देशांनी त्यांच्या गद्दारीची नोंद घेतली”
दोन्ही गटाकडून वर्धापन दिनाच्या सुरू असलेल्या तयारीबाबत विचारलं असता आदित्य ठाकरे म्हणाले, “वर्धापन दिन आम्हीच साजरा करणार आहोत. दुसरीकडे ज्यांची हकालपट्टी झाली आहे. सगळीकडून ‘रिजेक्ट’ झालेला माल आमचा वर्धापन दिन कसा काय साजरा करू शकतो. त्यांनी (शिंदे गट) ‘जागतिक गद्दार दिन’ साजरा करावा. कारण जगातील ३३ देशांनी त्यांच्या गद्दारीची नोंद घेतली आहे. तोच दिवस त्यांनी साजरा करावा. त्यांनी किती निर्लज्जपणे गद्दारी केली, हे त्यांनी लोकांना दाखवून द्यावं.”
