अजितदादांच्या सांगण्यावरुनच त्यांच्या पाठीमागे उभ्या होतो – रुपाली पाटील यांंचे सुषमा अंधारेंना उत्तर
पुणे, १० मे २०२३: विरोधकांकडून चरित्रहनन होत असताना राज्याचे विरोधी पक्षनेते त्यांच्याबद्दल एक शब्द देखील उच्चारत नाहीत अशा शब्दात ठाकरे गटाच्या प्रवक्त्या सुषमा अंधारे यांनी अजित पवार यांचे नाव न घेता टीका केली होती. त्याला प्रत्युत्तर म्हणून राष्ट्रवादी काँग्रेसच्या रूपाली पाटील यांनी दादा बोलले नसतील तरी त्यांच्या सांगण्यावरूनच आम्ही तुमच्या पाठीशी भक्कमपणे उभा होतो असे प्रत्युत्तर दिले आहे.
साताऱ्यामध्ये काल भारतीय भटके विमुक्त विकास व संशोधन संस्था पुरस्कार वितरण सोहळ्याचं आयोजन करण्यात आलं होतं. या कार्यक्रमात सुषमा अंधारे यांना बोलताना अश्रू अनावर झाले. विशेष म्हणजे या कार्यक्रमासाठी राष्ट्रवादीचे अध्यक्ष शरद पवार यांनीही हजेरी लावली होती. शरद पवारांसमोरच त्यांना अश्रू अनावर झाले. पण यावेळी बोलताना अंधारे यांनी विधानसभेचे विरोधी पक्षनेते अजित पवार यांची तक्रार शरद पवारांकडे केली होती. यावर आता राष्ट्रवादी काँग्रेसच्या महिला नेत्या रुपाली पाटील ठोंबरे यांनी आपली प्रतिक्रिया दिली आहे.
रुपाली पाटील म्हणाल्या, सुषमा अंधारे या बहिणीच्या नात्याने बोलल्या असतील. सुषमा अंधारेंवर सत्ताधारी गटाकडून खालच्या पातळीवर टीका करण्यात येते आहे. सत्ताधारी पक्षातील मंत्री त्यांच्यावर बोलतात. त्यामुळे त्यांना बहिणीच्या नात्याने वाटलं असेल की भाऊ बोलला नाही. पण आम्ही अजितदादांच्या सांगण्यावरुनच त्यांच्या पाठीमागे उभ्या होतो, असे त्या म्हणाल्या आहेत.
सुषमा अंधारेंचे भावनिक होणे स्वाभाविक आहे. अशा प्रकारे सातत्याने चारित्र्याचे हनन करण्यात येते आहे. यावर त्या बोलल्या आहेत. त्यांनी बहीण म्हणून भाऊ न बोलल्याची खंत शरद पवारांकडे व्यक्त केली असेल, असे त्या म्हणाल्या आहेत.
सुषमा अंधारे म्हणाल्या, माझ्या बापाबद्दल लोकं वाटेल त्या पद्धतीने बोलत आहेत. कसं असतंय, शेतात नांगरणी होते त्यानंतर पेरणी, आणि मग पहिला पाऊस होतो. पाऊस झाल्यानंतर कसदार पीक येतं. कणंसं येतात. कणसं भरल्यानंतर मळणी यंत्रणातून धान्य येतं. त्यावेळी येणारे-जाणारे त्या धान्याच्या ढिगाकडे पाहुन दुसरा माणूस म्हणतो, पीकाकडे काय बघतो, जमीनच एवढी भारी आहे तर पीकं तर येणारचं, या शब्दांत अंधारेंनी विरोधकांना सुनावलंय.
विश्वासहार्य राजकीय बातम्यांसाठी ज्वाईन करा “सरकार खबर” ग्रुप
