पुण्यात अजित पवारांचे जबरदस्त स्वागत; राष्ट्रवादीच्या कार्यकर्त्यांनी केले शक्ती प्रदर्शन

पुणे, ६ जानेवारी २०२३ : नागपूर येथील विधिमंडळाच्या अधिवेशनात विरोधी पक्षनेते अजित पवार यांनी छत्रपती संभाजी महाराज हे धर्मवीर नव्हे तर स्वराज्य रक्षक होते असे वक्तव्य केल्याने त्यांच्या विरोधात भाजप व हिंदुत्ववादी संघटनांनी राज्यभर आंदोलने सुरू केली आहेत. त्यामुळे भाजप आणि राष्ट्रवादीचे कार्यकर्ते एकमेकावर सोशल मीडियावर व रस्त्यावर आंदोलने करत आहेत. त्याच दरम्यान आज अजित पवार यांचे राष्ट्रवादी काँग्रेसचे भव्य स्वागत करण्यात आले. कार्यकर्त्यांनी शक्ती प्रदर्शन करत “एकच वादा अजितदादा”, “आम्ही कधीच राजकारण केले नाही धर्मांचे अन् जातीचे.., नेहमी हित पाहिले आहे महाराष्ट्राच्या मातीचे..” , स्वराज्यरक्षक छत्रपती संभाजी महाराजांचा विजय असो “ अश्या प्रकारच्या घोषणांनी बारामती हाॅस्टेलचा संपूर्ण परिसर दणाणून सोडला होता.

“गेल्या काही महिन्यांपासून महाराष्ट्राच्या सत्ताधारी पक्षातील मंत्र्यांकडून महाराष्ट्रातील थोर महापुरुषांबद्दल अवमानजनक वक्तव्य करण्याची एक मालिका सुरू आहे, यावेळी पुणे शहर भाजपमधील एकाही पदाधिकाऱ्याने कुठल्याही प्रकारचे आंदोलन केले नाही किंवा साधा निषेधही व्यक्त केला नाही, परंतु छत्रपती संभाजी महाराजांबद्दल स्वराज्यरक्षक छत्रपती संभाजी महाराज अशी भूमिका मांडल्यानंतर शहरातील भाजप पदाधिकाऱ्यांनी चुकीच्या पद्धतीने अजितदादांच्या विरोधात आंदोलने केली यावर अजितदादांनी मी छत्रपती संभाजी महाराजांना कोणत्या एका धर्माच्या चौकटीत आणू इच्छित नाही , स्वराज्यरक्षक छत्रपती संभाजी महाराज हे शेवटच्या श्वासापर्यंत स्वराज्याच्या रक्षणासाठी लढत राहिले, सर्व जातीधर्मीय बांधवांच्या स्वराज्याच्या रक्षणासाठी लाढणाऱ्या आमच्या वीर योद्धाला “स्वराज्यरक्षक छत्रपती संभाजी महाराज” याच नावाने संबोधनार, अशी ठाम भूमिका आदरणीय अजितदादांनी घेतली. या भूमिकेचे स्वागत करत, आदरणीय अजितदादांना पाठिंबा दर्शवण्यासाठी आमचे हजारो कार्यकर्ते बारामती होस्टेल येथे अजितदादा पवार यांच्या स्वागतासाठी आलो आहोत” ,असे मत राष्ट्रवादी काँग्रेस पार्टीचे शहराध्यक्ष प्रशांत जगताप यांनी व्यक्त केले.

तसेच यावेळी पुणे शहर राष्ट्रवादी काँग्रेस पार्टीच्या वतीने “स्वराज्यरक्षक संभाजी महाराज” या नावाच्या १०००० स्टिकर्सचे अजितदादांच्या हस्ते प्रकाशन करण्यात आले असून, सर्व पदाधिकाऱ्यांच्या वाहनांवर, घरांच्या दरवाजांवर व दुकाने- आस्थापनांवर अशा प्रकारचे स्टिकर्स लावण्यात येणार असून जास्तीत जास्त लोकांमध्ये स्वराज्यरक्षक संभाजी महाराजांच्याबाबत आपली भूमिका रुजविण्याचा राष्ट्रवादी काँग्रेस पार्टीच्या वतीने सांगण्यात आले.
प्रसंगी राष्ट्रवादी काँग्रेस पार्टीचे शहराध्यक्ष प्रशांत जगताप, प्रवक्ते प्रदीप देशमुख, रवींद्र माळवदकर, वनराज आंदेकर , बाळासासाहेब बोड़के , निलेश निकम , उदय महाले , शारदा ओरसे , गफूर पठान , रुपाली पाटील , विनोद पवार , संदीप बालवडकर, महेश हंडे , दिपक कामठे, रोहन पायगुडे, गुरूमीत गिल आदी उपस्थित होते.